'De Kea 'a ‑fli ‑sɔn
91
Nyɔ ‑wlaa' Kea ‑nɩa 'e dɩ ‑wee'‑ "klein "jrukpɔ' "jru ‑sɔn ɛ,ɔ ‑teɛ 'flɛ 'ʋn 'de "ikma Kea 'a ‑fli ‑sɔn.
2 'Ɩn wlu' ka 'ɩn 'na:
Tʋ "bo ɛmɛ ‑nɩ 'ma "jru 'wlaaɩn',
ɛmɛ ‑nɩ 'ma ‑gblo",
ma Kea 'ɩn ‑tea' ‑kwlɩ" ɛ.
3 Ɛmɛ ‑ɛɛ seie ‑ʋn
'de nyɔsaʋn 'a ‑sepeɛ 'kwa, 'de 'wɛ saʋn ‑pʋn".
4 ‑Ma muɛ 'de ɛɛ' sʋn ‑sɔn nɩa'
ka ‑gbmaʋn sʋn" a ‑fluua ɛɛ' "nynuu‑ "kpei ɛ.
Ɛɛ' ‑maa' ‑saa wlu ‑kwlin
nɩ 'ma "i kaan dɛ ‑o
‑wɛe ɛ nɩ 'ma nɩɩɛ bai".
5 Dɩ ‑blea nyɔ 'ɔ faʋn "maʋ o,
'sɩn ‑ɩa ‑siia' 'ʋn 'jrʋ ‑gbao o,
ɩa' faʋn "bo ‑ʋn nʋɛ.
6 'Wɛ ‑ɛɛ naa nyʋ ‑sɔn "maʋ o,
'jrʋ ‑a fan 'jrʋ ‑gbao o,
ɩ se ‑ʋn faʋn "i 'dbaa i.
7 ‑Bo nyiɔ 'ɔ "wlu due'
'wla 'de ‑ma kʋʋan fɔ o,
‑wɛe ‑kwlʋ due'
'wla 'de ma diian fɔ o,
dɛ jrɛ' se ‑mii" bla i.
8 ‑Gbʋn 'e mu ‑crɔɔn'
‑ma muɛ 'diwɔnyniʋn 'a
dɩsaɩn 'a ‑kao 'jeea'.
9 Tʋ "bo ‑nɩ 'ma sro' 'wlaa na'.
‑Bo ‑ɩn ‑nɩ 'e Kea ‑nɩa 'e dɩ ‑wee'‑ "klein "jrukpɔɔ' ‑fli ‑sɔn ɛ,
10 nai" ‑tɩ' due' koun ka jrɛ' se ‑ʋn 'jei,
"nmiatɩ‑ jrɛ' se ‑ma ‑gbu" di pa i.
11 Dɛ ‑nʋɛ,
ɛɛ muɛ ɛɛ' "sʋɩ dboa',
ʋʋ 'je ‑ma ‑jeblʋ "i fuo.
12 Ʋʋa muɛ ‑ʋn kwa 'blea'
‑wɛe ‑ma bʋ e "soukpo "i ‑tiie'‑.
13 ‑Ma muɛ ‑plaa‑ ke jɔ "kpei naa',
‑wɛe ‑ɩn ‑je ‑plaa‑ 'a "ju ke,
‑sre" bʋ ‑sɔn i sʋʋan‑.
14 ‑Jɛ ɔ ke 'mɔ Kea "siia "i 'jaa,
‑mɛ 'ma muɔ 'pʋʋa',
‑wɛe 'ɩn 'jeɔ kwa "kpei ‑cri",
dɛ ‑nʋɛ ɔ juuo 'ʋn 'ɛ.
15 ‑Bo ɔ po 'ʋn ‑tooi" ɛ,
'ma muɛ 'wɔn 'a,
‑bo ɔ nɩ 'e 'kle 'di ɛ,
'ma muɛ wɔn 'a, ‑wɛe 'ɩn 'jeɔ ‑seie
'de 'ɩn 'jeɔ "i 'bɛɛ‑.
'Ma muɔ ‑seia',
‑wɛe 'ɩn 'jeɔ 'nynɩ ‑sa.
16 Ɔɔ muɛ 'kmʋ ‑kwlea',
‑wɛe ɔ 'jeɛ juuo,
ka 'ɩn nɩa ɔɔ' 'pʋʋ i ɛ.